Цэвэр усны м³ тутмын үнэ 1,340 төгрөгөөс 2,000 төгрөг, бохир усных 1,070 төгрөгөөс 1,820 төгрөг болж нэмэгдсэн бол дулааны үйлчилгээний тариф 5 хувиар өсөөд байна. Улаанбаатар хотын орон сууцны айл өрх болон аж ахуйн нэгжүүдийн ус, дулааны үйлчилгээний тариф шинэчлэгдлээ. Шинэ тарифаар тоолууртай айл өрхийн цэвэр ус нэг м³ нь 2,000 төгрөг, бохир ус 1,820 төгрөг болжээ. Мөн цэвэр усны үйлчилгээний суурь хураамж өрх бүрд 3,125 төгрөг, бохир усных 625 төгрөг байна. Үнийн дүн НӨАТ ороогүй үнэ хэмээн ОСНААУГ-аас мэдээллээ. Орон сууцны айл өрхийн ахуйн хэрэглээний халуун ус халаасан дулааны төлбөрийг усны зарцуулалтаар тооцвол м³ тутамд 1,714 төгрөг, хэмжүүрээр тооцох тохиолдолд 3,592 төгрөг/ байхаар тогтоожээ.

Ийнхүү цэвэр усны үнэ 49 хувиар, бохир усны төлбөр 70 хувиар нэмэгджээ

Тоолуургүй айл өрхийн хувьд цэвэр усны төлбөр нэг хүн тутамд 18,414 төгрөг, бохир ус 16,430 төгрөг байна. Халуун усны дулааны төлбөр халаалтын улиралд нэг хүнээс 1,964 төгрөг, халаалтын бус улиралд 2,946 төгрөг байхаар шинэчилсэн байна. Дулааны үйлчилгээний суурь хураамжийг орон сууцны талбайгаас хамааруулан шатлалтай тогтоожээ. 40 м² хүртэлх байр сард 3,465 төгрөг, 41-80 м² бол 5,775 төгрөг, 81 м²-ээс дээш бол 11,550 төгрөгийн суурь хураамж төлнө.

ААН-үүдийн ус айл өрхөөс өндөр тарифтай

Үйлдвэр, аж ахуйн нэгжийн хувьд цэвэр усны тариф ердийн ААН-д м³ тутамд 3,500 төгрөг, төсөвт байгууллагад 4,400 төгрөг байна. Харин спирт, архи, пиво, ундаа, усны үйлдвэр болон автомашин угаалгын газруудын цэвэр ус 4,940 төгрөг/м³, бохир ус 4,300 төгрөг/м³ байхаар тогтоожээ. Ноос, ноолуур, арьс шир боловсруулах үйлдвэрүүд цэвэр усанд 3,600 төгрөг/м³, бохир усанд 5,500 төгрөг/м³ төлнө.

Усны тарифыг тусгай зөвшөөрөл эзэмшигчдийн бодит зардал, үйлчилгээний тогтвортой байдлыг харгалзан тогтоох бөгөөд шаардлагатай тохиолдолд жилд нэг удаа индексжүүлэх боломжтой байдаг. Цэвэр усны м³ тутмын үнэ 1,340 төгрөгөөс 2,000 төгрөг, бохир усных 1,070 төгрөгөөс 1,820 төгрөг болж нэмэгдсэн бол дулааны үйлчилгээний тариф 5 хувиар өсөөд байна.

Төрийн үйлчилгээний үнийг нэмэхгүй гэсэн ЗГ-ын тогтоол хаачив

Энд нэг сонирхолтой өнцөг байна. Засгийн газар 2025 оны арванхоёрдугаар сарын 31-нд 2026 онд төрөөс иргэн, хуулийн этгээдэд үзүүлэх бүх төрлийн үйлчилгээний үнэ, тариф, төлбөр, хураамжийг нэмэгдүүлэхгүй байх чиглэл өгч, үүнтэй холбоотойгоор ЭХЗХ тухайн үед дулааны шинэ тарифын хэрэгжилтийг 2027 оны нэгдүгээр сарын 1 хүртэл хойшлуулж байв.

Гэтэл 2026 оны тавдугаар сарын шинэ шийдвэрүүдээр усны тариф огцом, дулааны тариф 5%-иар нэмэгдсэн нь “Үнэ тариф нэмэхгүй гэсэн Засгийн газрын шийдвэрийн хэрэгжилт хангагдаж байгаа эсэх нь тодорхойгүй байна.