Нийслэлийн зарим цэцэрлэгүүд 15:30-16:30 цагийн хооронд тарж, цагтаа хүүхдээ авахыг шаарддаг нь ажлаа тараад хүүхдээ авдаг эцэг эхчүүдийн хувьд цагийн хуваарийн уялдаагүй шийдвэр хэмээн цахим орчинд шүүмжилж байна. Тодруулбал, төрийн болон хувийн хэвшлийн ажилчдын дийлэнх нь орой 18:00 цагт тардаг. Үүнээс гадна тус цагаар замын хөдөлгөөний ачаалал нэмэгддэг. Гэтэл энэ цагтай цэцэрлэгийн тарах цаг давхцах, зарим цэцэрлэг түүнээс эрт тардгаас үүдэн эцэг эхчүүд хүүхдээ авах боломжгүй болж хүн гуйж авхуулах, шаардлагатай тохиолдолд ажлаа таслах зэрэг хүндрэл учирдаг талаар эцэг эхийн төлөөллүүд ярилаа. 

• П.Баяндалай "Би ач зээгээ сургууль, цэцэрлэгт нь зөөдөг. Ээж аав нь өглөө, оройд ажлын цагийн хуваарь болон замын түгжрэлтэй давхцаад яагаад ч хүргэж өгч авч амждаггүй"
• Ц.Анхбаяр "Ахынхаа хүүхдийг авч байна. Ээж аав нь авч амжихгүй тохиолдол их байдаг. Энэ үед том хүүхдүүд нь авдаг"
• Б.Билгүүн "Ажил тарах цагаас өмнө хүүхдийн тарах цаг болчихдог. Тэгэхээр ажлаа таслах уу, ар гэрээ зохицуулах уу гэх сонголт тулгардаг. Шаардлагатай тохиолдолд ажлаасаа чөлөө авна, эсвэл тасалдаг."
• П.Мөнгөнтуул "Би ЕБС-д багшилдаг. Ажил 17:30-18:30 хооронд тардаг болохоор хүүхдээ авч амжихгүй тохиолдол их байдаг. Тэр үед хүн гуйна, ах нараар нь дүүг нь авхуулах зэргээр зохицуулдаг."

Улсын цэцэрлэгийн ажиллах цагийн хуваарийг тухайн цэцэрлэгийн байршил болон эцэг эхчүүдийн хүүхдээ авах боломжтой цагийг харгалзан үзэн орох болон тарах цагийг тогтоодог байна. Цэцэрлэгийн багш ихэвчлэн 07:30-8:00 цагт ажилдаа ирдэг. Харин 17:00-18:00 цагийн хооронд хүүхдүүдээ тарааж, үлдсэн ажлаа дуусгаад гэртээ харьдаг. Харин энэ хооронд эцэг эх нь хүүхдээ авч амжаагүй бол Боловсролын яамнаас мэдээлсэн журмын дагуу илүү цагийн мөнгө төлөн харуулах боломжтой байна.

• Энэ талаар 212-р цэцэрлэгийн багш Ш.Эрдэнэцэцэг "Ихэнхдээ 18:00 цагт хүүхдүүд тараад дуусчихсан байдаг. Хааяа эцэг эх нь үнэхээр авч амжихгүй тохиолдолд багшдаа мэдэгдээд илүү цагийн төлбөрөө төлөн харуулах боломжтой"

Ийнхүү зохицуулалт хийсэн ч иргэдийн ажлын цагийн хуваарь болон цэцэрлэгийн ажиллах цаг хоорондын асуудал одоог хүртэл яригдсаар байна. Эцэг эхчүүдийг ажлаа таслахад хүргэхгүй, багш нарыг сунаж ажиллуулж чирэгдүүлэхгүй байх хамгийн боломжит гарц нь ээлжийн буюу уртасгасан цагийн багшийг төсөвтэй нь шийдэж өгөх, эсвэл ажил олгогчид бага насны хүүхэдтэй ажилтнууддаа уян хатан цагийн хуваарь санал болгох явдал юм. Энэ бол боловсрол болон хөдөлмөрийн салбарын хоорондын уялдааг нэн даруй сайжруулах шаардлагатай байгааг сануулж байгаа юм.