УИХ-аас Ж.Эпштейнтэй холбоотой сонсголыг зохион байгуулж байна. Энэ үеэр ХЭҮК-ын гишүүн Ж.Хунан хагас болон бүтэн өнчин хүүхдийн эрхийн зөрчлийн талаар мэдээлэл өглөө.

Тэрээр "Хагас болон бүтэн өнчин хүүхдүүдэд онцгой анхаарал хандуулах шаардлагатай. Яагаад гэвэл, хүн худалдаалах гэмт хэрэг, бэлгийн мөлжлөгийн хохирогч болох эрсдэл өндөр. Манай улсад 

• 2021 онд 2990,
• 2022 онд 2911,
• 2023 онд 2697,
• 2024 онд 2576,
• 2025 онд 2802 бүтэн өнчин хүүхэд тоологдсон. Энэ тоо яагаад ийм хэлбэлзэлтэй байгаа талаар тодорхой тайлбар байдаггүй. Бүтэн өнчин, хагас өнчин хүүхдийн асуудлыг шийдэх бодлогын бичиг баримт зайлшгүй шаардлагатай. 

Гадаадад үрчлэгдсэн 277 хүүхэд байна. 2023 оноос хойш гадаадад хүүхэд үрчлэгдээгүй. Үүнд тавьдаг хяналт маш хангалтгүй байна. БНХАУ руу нэвтэрч байгаа 17 мянга гаруй хүнтэй ярилцлага хийхэд 235 хүүхдийн аялал эрсдэлтэй гэж гарсан. Үүнээс 104 хүүхдийн аяллыг зогсоосон. Хүний наймаа, бэлгийн мөлжлөгт өртөхөөс сэргийлж чадсан гэсэн үг. Хилийн гарч байгаа хүүхдийн тоо статистикаар гардаг ч буцаж орж ирж байгаа хүүхдийн тоо гардаггүй " хэмээх мэдээллийг өглөө.