Пүрэв гарагт Баянзүрх дүүргийн 35 дугаар хороо Хужирбулан дахь Бурхантын энгэр хэмээх газарт шөнийн 01.00 цагийн үед “Унтаж байхад нь баавгай” халдсан хэмээх дуудлага ирсэн. Албаныхан 30 минутын дараа очиход баавгай тухайн гэр байсан хоёр иргэн рүү дайрч, эрэгтэй нь газар дээрээ нас барсан харамсалтай хэрэг гарлаа. 

50 гаруй насны хохирогч эмэгтэйг яаралтай ГССҮТ-ийн салбар эмнэлэгт хүргэсэн бөгөөд үдээс хойш төв эмнэлгийн Толгойн мэс заслын тасаг руу шилжүүлжээ. Биеийн байдал маш хүнд байгаа талаар салбар эмнэлгийн эмч мэдээлсэн бол Онцгой байдлын албанаас хохирогчийг өөрийн гэсэн эрүүл ухаантай байгаа гэж мэдээллээ. 

Энэхүү хэргийн талаар хохирогчийн хамаатан “Eagle” телевизэд мэдээлэл өгчээ.  

• Өнгөрсөн хугацаанд Улиастайн голд гурван удаа баавгай үзэгдсэн гэж хүмүүс ярьж байсан. Ингээд эцэст нь хүний амь насанд хүрчихлээ. Одоо энэ асуудлыг төр засаг анхааралдаа авах хэрэгтэй байна. Дээр сууж байгаа хүмүүс л бидний аюулгүй байдлыг хангах ёстой биз дээ. Хохирогчийг баавгай гурван хэсэг болгосон гэж ярьж байна. Өглөө цагдаагийнхан ирээд аваад явсан. Нөгөө хохирогчийн толгой хэсгийн арьсыг нь хуулсан гэж ярьцгааж байна. Улаанбаатар хотод ч тэр хаа сайгүй баавгай ороод ирчихлээ гээд яриад л байсан шүү дээ. Энэ хугацаанд яагаад ямар ч арга хэмжээ авалгүй өдийг хүрч байгаа юм бэ. Заавал хүний амь насанд хүрч, нэг айлын голомтыг самарч байж хөдлөх ёстой байсан юм уу. Үнэхээр хэлэх үг алга. Хоёулхнаа гэртээ байсан юм билээ. Амиа алдсан залуу бол хүн бүрд тусалдаг, хорхойд ч хоргүй сайн хүн байсан. Өчигдөр хоёр хоног хот явчхаад ирье гээд гарсан. Эгчийгээ орхиод гарсан учраас буцаад ирсэн юм байна лээ. Эгчийнх нь хувьд 1990 оноос хойш энд амьдарч байгаа.

Мөн хохирогч эмэгтэйн нагац дүү Zarig.mn сайтад мэдээлэл өглөө. 

• Манай эгч Улиастайд үхэр маллаж амьдардаг. Оройн 21 цагийн үед бэр нь холбогдоход бүх зүйл хэвийн байсан гэсэн. Гэмтлийн хувьд хуйхны арьс байхгүй, хацар орчмын хэсэг гэмтэлтэйгээс гадна гавлын яс цөмрөлттэй ийм байдалтай байна. Одоогоор хагалгаа төлөвлөгдөөгүй гэж эмч нар хэлсэн. Хамтарсан үзлэгээр шийдэгдэнэ гэсэн мэдээлэлтэй байна. Амиа алдсан залуугийн хувьд эгчийн хадланд туслахаар ирсэн залуу юм билээ. Тухайн үед эгч өөрөө ямар ч ухаангүй байсан учраас бидэнд ямар ч мэдээлэл өгөөгүй. Бид өглөө 09 цагийн үед эмнэлгээс л мэдээлэл авсан. Яг одоогийн байдлаар амин үзүүлэлт нь тогтворжсон ч ухаан нь бүдэг байгаа. Одоо энэ асуудал дээр хэн хариуцлага хүлээж, ямар арга хэмжээ авах вэ гэдэн сонин байна даа.