Монгол Улсын Их Хурлын 2024 оны хаврын чуулганы хуралдаан үргэлжилж байна. Хуулийн дагуу хуралдаан долоо хоног бүрийн пүрэв, баасан гарагт 10 цагаас эхэлдэг ч ирц хүрээгүй шалтгаанаар 1 цаг хоцорч эхлэв.

Гишүүдийн хуралдааны ирцийг 72 гишүүнээр баталгаажуулан дийлэнх буюу 39 гишүүн ирснээр хуралдааныг хүчинтэйд тооцон хуралдаж байна.

Хуралдааны үеэр гишүүд орж гарах, Засгийн газрын гишүүд хуралдаанаа орхих зэргээр хариуцлагагүй аашилж байлаа.

УИХ-ын дарга Г.Занданшатар байн байн гишүүдийг суудалд суухыг гуйж, Засгийн газрын гишүүдийг хуулийн төслүүдээ хэлэлцэж дууссаны дараа танхимаа орхихыг хүсэв.

Мөн “Өдий үед хууль хэлэлцэх маш хэцүү байдаг. Өмнөх парламент хурууны хээгээр бүртгүүлдэггүй, санал өгдөггүй байсан учраас “төгөлдөр хуурдах” гэдэг нэр томьёотой. 7 хүн сууж байгаад л хууль баталчихдаг байсан байна билээ” хэмээн үнэнээ өчжээ.

Хуралдааны ирцэд тооцоогдохгүй гишүүд

Монгол Улсын Их Хурлын тухай хуулийн 10.1.2-т зааснаар хүндэтгэн үзэх шалтгаанаар чөлөөлөгдөх хүсэлтээ өөрөө гаргасан:

• Чингэлтэй дүүргээс сонгогдсон Т.Аюурсайхан: “Нүүрсний” гэх хэргээр 3 жил хорих ял эдэлж байна
• Архангай аймгаас сонгогдсон Ж.Мөнхбат: Хувийн шалтгаанаар
• Сонгинохайрхан дүүргээс сонгогдсон Х.Нямбаатар: Хотын дарга болсон

Монгол Улсын Их Хурлын тухай хуулийн 9.5-д зааснаар бүрэн эрхийг нь түдгэлзүүлсэн УИХ–ын тогтоолоор:

• Д.Бат-Эрдэнэ: “Нүүрсний” гэх хэрэгт шалгаж буйтай холбогдуулан

Бусад гишүүд хаачсан бэ?

Монгол Улсын Их Хурлын ээлжит сонгууль дөхөж буйтай холбогдуулан “тойргоо услах”-аар нэр дэвших бүсээрээ тойрч явна. Тухайлбал:

• УИХ-ын дэд дарга Л.Мөнхбаатар Булган аймагт
• УИХ-ын гишүүн, УИХ дахь АН-ын бүлгийн дарга О.Цогтгэрэл Увс аймагт
• УИХ-ын гишүүн С.Ганбаатар, А.Адъяасүрэн нар Баянхонгор аймагт
• УИХ-ын гишүүн Ж.Батсуурь, Н.Ганибал нар Дорнод аймагт
• УИХ-ын гишүүн Ж.Бат-Эрдэнэ Хөвсгөл аймагт