УИХ дахь АН-ын бүлгээс мэдээлэл хийлээ. Бүлгийн хуралдаанаар намын гишүүд орон нутагт ажилласан талаар, 2025 оны Төсвийн хүрээний мэдэгдэл, төсвийн төсөөллийн тухай хэлэлцсэн байна. 

Энэ талаар УИХ дахь АН-ын бүлгийн дарга О.Цогтгэрэл "Төсвийн хууль зөрчиж зарцуулсан мөнгөний зарцуулалт ил тод биш байна. Цар тахлын үеийн мөнгөний зарцуулалт, "Ногоон автобус"-ны сонсгол гээд бараг 20 их наяд төгрөгийн асуудал яригдахгүй байна. Мөн газар олголтын талаар сонсгол хийнэ гэсэн байхгүй байна. Өнгөрсөн дөрвөн жил санхүүгийн сахилга батгүй байлаа. Тиймээс АН-аас дараах уриалгыг гаргаж байна" гэлээ. 

Мөн УИХ-ын гишүүн Н.Ганибал "Хөдөө орон нутгаар яваад үзэхэд ард түмэн энэ удаа АН-ыг ялуулахыг маш их хүсэж байна. Монголын ардчиллын нэр хүндийг унагасан хүмүүс намын жагсаалтын ард нуугдаж болохгүй гэж байна. Иргэд АН болон Монголын ардчилагч нар ялах ёстой гэж үзэж байна" гэлээ.