Монголын сагсан бөмбөгийн холбооноос зохион байгуулдаг Үндэсний Дээд Лигийн 2024-2025 оны улирал 10-р сарын 12-нд эхэлнэ. Энэ улирлын тоглолт гурван тойрогтой, эмэгтэй 6, эрэгтэй 12 баг оролцохоор болсон.

Багуудын амжилт ямар тамирчинтай гэрээ үзэглэж, ямар солилцоо хийхээс шалтгаалах тул дотоодын болон лигонер тамирчид ихээхэн анхаарал татаж байна.

Лигонеруудын хөзөр төдийлөн дэлгэгдээгүй ч багуудын хооронд дараах солилцоо, наймаа өрнөжээ.

BHC GARID баг

2022-2023 оны улирлын Үндэсний Дээд Лигийн аварга, финалын MVP лигонер тоглогч Пендарвис Уиллиамс багтай гэрээ байгуулжээ. Ингэснээр ирэх улиралд аваргалах магадлал өндөртэй багуудын нэг болж байна. 

IHC APES баг

Б.Тулуй, Ц.Санчир, Н.Ганбаатар, Т.Мэндбаяр нартай гэрээгээ сунгажээ. Бүрэлдэхүүний сул байрлалд хэн орж ирэх нь одоогоор тодорхойгүй бөгөөд хүлээлт өндөртэй байна.

SELENGE BODONS баг

Тэд шинэ улирлын бэлтгэлээ хангаж, хамгийн их хөдөлгөөнтэй байгаа. Мөн өнгөрсөн улиралд хөгжлийн лигээс дээд лигт дэвшиж, багагүй амжилт үзүүлсэн баг юм. Өнгөрөгч улиралд “Амжилт ахисан” тоглогчоор  шалгарсан О.Тулга, багийн ахлагч Б.Батзолбоо, П.Мөнх-Оргил нартай гэрээгээ сунгаж, гурван жилийн гэрээ байгуулсан.

Харин “3х3 Pro League”-ийн үеэр IHC Apes багаас чөлөөлөгдсөн Н.Батбаяр, Б.Энхсайхан, Э.Цэрэнбаатар нарыг албан ёсоор багтаа нэгтгэж чаджээ.

Эдгээр солилцоо нь сагсан бөмбөг сонирхогчдын анхаарлыг хамгийн ихээр татаад буй юм.

ULAANBAATAR AMAZONS баг

Үндэсний дээд лигийн алт, мөнгөн медальт, 2022-2023 оны Summer league-ийн аварга, MVP Г.Булганыг эгнээндээ нэгтгэсэн байна.

АРАВТ баг

Үндэсний дээд лигийн алт, мөнгөн медальт Б.Өнөрзаяатай хамтран ажиллах гэрээ байгуулжээ. 

Сагсан бөмбөг сонирхогчдын дунд гарч буй шуум, мэдээнээс сонирхуулбал

• Эрдэнэт Майнерс багаас Э.Мөнхбаяр IHC Apes баг руу
• Бишрэлт Металл багаас Г.Цэлмэг IHC Apes баг руу
• Сэлэнгэ Бодонс багаас А.Базаргүр IHC Apes баг руу 
• Налайх Бизон багаас Э.Пүрэвдорж, С.Дугар-Эрдэнэ нар Бишрэлт Металл баг руу 
• Эмэгтэй драфтын тэргүүн сонголт Н.Минжирмаа Stars багаасаа явж Аравт баг руу гэсэн таамаг, шуум гараад байгаа юм. 

Нийтлэлийг зургаар харах бол энд дарна уу.