“Гуравхан сарын дотор Засаг даргаа огцруулсан анхны аймаг Булган болох уу” гэх таамаг биеллээ олжээ. Учир нь Булган аймгийн ИТХ өнөөдөр буюу хоёрдугаар сарын 13-нд хуралдаж, Засаг дарга Д.Пүрэв-Очирыг огцруулах эсэх асуудлыг хэлэлцжээ.

Ийнхүү санал хураалтаар 29 төлөөлөгчийн 17 нь /58.6%/ дэмжин Засаг даргаа огцрууллаа. 

Төлөөлөгчид Д.Пүрэв-Очирыг огцруулах үндэслэлээ дараах байдлаар гаргажээ.

1. Засаг дарга Д.Пүрэв-Очир нь Хутаг-Өндөр сумын Засаг дарга О.Далайцэрэнг томилохдоо хууль тогтоомжийг ноцтой зөрчсөн гэж үзжээ. Ингэхдээ Авлигын эсрэг хуулийн долоодугаар зүйлийн 7.1.3. "албан үүргээ гүйцэтгэхдээ хууль бусаар аливаа хувь хүн, хуулийн этгээдэд давуу байдал олгох, олгохоор амлах, бусдын эрхийг хязгаарлах;", 7.1.6. "албаны эрх мэдэл буюу албан тушаалын байдлаа урвуулах, хэтрүүлэх;” гэсэн заалтуудыг тус тус зөрчсөн байна. 
2. Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 56 дугаар зүйлийн 56.3.2. "төрийн албанд гурваас доошгүй жил ажилласан” гэх шаардлагыг хангахгүй байна гэж үзжээ. 
3. Хүний нөөц бэлтгэх хөтөлбөрийг зогсоосон.
4. Төрийн албаны тухай хуульд заасан шаардлага хангахгүй иргэн Д.Наранбаярыг Аймгийн тамгын газрын даргаар томилж хууль ёсны зарчмыг баримтлахгүйгээр хууль зөрчиж шийдвэр гаргасан байна. Энэхүү үйлдэл нь Эрүүгийн хуулийн 22.1 дүгээр зүйлийн 22.1-1 дэх хэсэгт зааснаар Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, Д.Наранбаярт давуу байдал бий болгосон байх тул тус үйлдлийг зөрчилд тооцож, Авлигатай тэмцэх газар шалгуулах шаардлага бий болсон.
5. БНСУ-д богино хугацаанд гэрээгээр ажиллах боломжийг зогсоосон гэж тус аймгийн ИТХ-ын төлөөлөгчид үзжээ.

Дээрх үндэслэлүүдээр аймгийн Засаг дарга Д.Пүрэв-Очирыг огцруулах саналыг тус аймгийн 14 төлөөлөгч гарын үсэг зуран ИТХ-ын даргад өргөн барьсныг өнөөдөр шийджээ.